Bæjarstjórn Mosfellsbæjar hefur í samræmi við 25. og 26. gr. skipulags- og byggingarlaga nr. 73/1997 samþykkt eftirtaldar deiliskipulagsáætlanir og breytingar á deiliskipulagi: Við Skarhólabraut, lóð slökkvi- og lögreglustöðvar. Nýtt deiliskipulag. Lóðin er norðan Skarhólabrautar, næst Vesturlandsvegi, um 16.700 m² að stærð, með tvær tengingar við Skarhólabraut. Meginbygging verður tveggja hæða, staðsett norðantil á lóðinni, með aðstöðu slökkviliðs í austurenda og fyrir miðju en lögreglustöð í vesturenda. Bílastæði og athafnasvæði verða sunnan hússins. Austast á lóðinni er gert ráð fyrir tækjageymslu í stakri byggingu. Hámarksnýtingarhlutfall er 0,4. Samþykkt skv. 25. gr., 7. apríl 2010. Skarhólabraut, breytingar á deiliskipulagi frá 2008. Breytingarnar tengjast áformum um slökkvi- og lögreglustöð við Skarhólabraut og felast einkum í fjölgun akreina á kafla vestast og tveimur nýjum tengingum við götuna. Samþykkt skv. 1. mgr. 26. gr., 10. mars 2010. Ofangreindar deiliskipulagsáætlanir og breytingar á deiliskipulagi hafa hlotið þá meðferð sem skipulags- og byggingarlög nr. 73/1997 með síðari breytingum mæla fyrir um og öðlast þær þegar gildi. F.h. Mosfellsbæjar, 14. maí 2010, Finnur Birgisson skipulagsfulltrúi. |