Samkvæmt heimild í 81. gr. umferðarlaga nr. 50/1987, með síðari breytingum, og að fengnum tillögum stjórnar Isavia ohf. og bæjarstjórnar Sandgerðisbæjar hefur lögreglustjórinn á Suðurnesjum ákveðið að setja eftirfarandi reglur um umferð: 1. Bifreiðastöður. Bannað er að leggja óskráðum og óökufærum bifreiðum, vinnuvélum, öðrum ökutækjum eða eftirvögnum á almenningsbílastæði og bílastæði í eigu Isavia ohf., við götubrún eða annarsstaðar á almannafæri innan skipulagssvæðis Flugstöðvar Leifs Eiríkssonar (FLE) og við Flugstöð Leifs Eiríkssonar. Bannað er að leggja skráðum bifreiðum nema í merkt bifreiðastæði innan skipulagssvæðis Flugstöðvar Leifs Eiríkssonar og við Flugstöð Leifs Eiríkssonar. Bifreiðastöður eru bannaðar beggja vegna Kríuvallar, Arnarvallar og Kjóavallar, Blikavallar og Fálkavallar landmegin við aðgangshlið flughlaðs FLE.
Á lóð Flugstöðvar Leifs Eiríkssonar gildir eftirfarandi: Bifreiðastöður eru bannaðar nema í merktum bifreiðastæðum. Bannað er að leggja bifreiðum og öðrum ökutækjum í bifreiðastæði við fjærakrein aðkomu flugstöðvarinnar að vestanverðu (brottfararsvæði – merkt B á teikningu sem birt er sem fylgiskjal með auglýsingu þessari). Eingöngu er leyft að afferma ökutækin, en ökumaður skal ekki yfirgefa bifreiðina. Bannað er að leggja bifreiðum og öðrum ökutækjum í bifreiðastæði við nærakgrein aðkomu flugstöðvarinnar að vestanverðu (brottfararsvæði – merkt C á teikningu) nema hópbifreiðum og leigubifreiðum, sem hafa eingöngu leyfi til að afferma bifreiðarnar. Bannað er að leggja bifreiðum og öðrum ökutækjum á aðkomusvæði flugstöðvarinnar vestanmegin að norðanverðu (brottfararsvæði – merkt D á teikningu) nema fyrir hreyfihamlaða einstaklinga, sem hafa eingöngu leyfi til að afferma bifreiðarnar. Bifreiðastöður eru bannaðar í bifreiðastæðum á aðkomusvæði flugstöðvarinnar vestanmegin að norðanverðu (brottfararsvæði – merkt E á teikningu) nema fyrir hópbifreiðar og leigubifreiðar með 60 mínútna hámarksstöðutíma. Bifreiðastöður eru bannaðar í bifreiðastæðum á aðkomusvæði flugstöðvarinnar austanmegin að norðanverðu (komusvæði – merkt F) nema fyrir leigubifreiðar með 60 mínútna hámarksstöðutíma. Allur akstur er bannaður á aðkomusvæði flugstöðvarinnar að austanverðu (komusvæði) fyrir utan neyðarakstursökutæki nema með leyfi Flugstöðvar Leifs Eiríkssonar.
2. Umferðarskipulag austan Flugstöðvar Leifs Eiríkssonar (komusvæði). Innkeyrsla frá norðri að flugstöðinni að austanverðu, er aðeins heimil fyrir leigubifreiðar. Hluti af bifreiðastæðum sem notuð hafa verið fyrir bílaleigubifreiðar verða einnig nýtt fyrir hópbifreiðar. Stæðið er aðskilið, þ.e. fyrir hópbifreiðar að norðanverðu annars vegar (svæði merkt G á teikningu) og bílaleigubifreiðar að sunnanverðu hins vegar (svæði merkt H á teikningu) og er akstur allra annarra ökutækja óheimill sem og bifreiðastöður. Hámarksstöðutími er 60 mínútur. Akstur á vegi austan við bifreiðastæði fyrir hópbifreiðar og bílaleigubifreiðar, verður óheimill fyrir aðra en hópbifreiðar, bílaleigubifreiðar og þá sem eiga erindi að vörumóttöku. Bifreiðastæði fyrir hópbifreiðar með sérleyfi er fyrir sunnan akveg frá flugstöð að austanverðu (svæði merkt I á teikningu). Hámarksstöðutími eru 60 mínútur. Eftir atvikum gildir ofangreint um önnur ökutæki og eftirvagna.
Ákvörðun þessi tekur gildi við birtingu auglýsingarinnar. Lögreglustjórinn á Suðurnesjum, 3. október 2013. Sigríður Björk Guðjónsdóttir. Fylgiskjal. (sjá PDF-skjal) |