Gerð um endurskoðun evrópska einkaleyfasamningsins, sem samþykkt var í München 29. nóvember 2000 og birt var í C-deild Stjórnartíðinda 2004 (C1), öðlast gildi 13. desember 2007. Á sama tíma öðlast gildi ákvæði 40. gr. a, 40. gr. b, 1. mgr. 54. gr. og 87. gr. a í lögum nr. 17/1991 um einkaleyfi, með síðari breytingum.

Gerðin er endurskoðun á evrópska einkaleyfasamningnum sem gerður var í München 5. október 1973. Með ályktun 19. maí 2004 heimilaði Alþingi að Ísland gerðist aðili að gerðinni og voru þýska utanríkisráðuneytinu afhent aðildarskjöl vegna hennar 31. ágúst 2004.