I. KAFLI

1. gr.

Reglur þessar gilda um eftirtalda aðila:

Útgefendur samkvæmt 1. tl. 1. mgr. 2. gr. laga nr. 11/2008 um sértryggð skulda­bréf.
Sjálfstæða skoðunarmenn samkvæmt 1. mgr. 21. gr. laga nr. 11/2008 um sér­tryggð skuldabréf.

II. KAFLI

2. gr.

Með skriflegri umsókn um leyfi til útgáfu sértryggðra skuldabréfa skal útgefandi veita upplýsingar um og leggja fram eftirfarandi gögn til Fjármálaeftirlitsins:

Afrit af samþykkt stjórnar eða bókun í fundargerð frá fundi stjórnar er ákveðið var að leggja fram umsókn um leyfi til útgáfu sértryggðra skuldabréfa.
Lýsing á hinni fyrirhuguðu útgáfu þar sem fram kemur hvernig útgefandinn hyggst standa að skipulagningu og verklagi vegna sértryggðu skuldabréfanna og tryggingasafnsins. Þar skulu m.a. koma fram upplýsingar um stærð útgáfu, flokka útgáfu, afleiður, tryggingar, staðgöngutryggingar, veðhlutföll, matsaðferðir, reglu­bundið endurmat, viðvarandi mat á tryggingasafninu og innra eftirlit með útgáf­unni.
Upplýsingar um skrá skv. 13. gr. laga nr. 11/2008 um sértryggð skuldabréf. Þar skulu m.a. koma fram upplýsingar um framkvæmd skráningar, hvar skráning fer fram, á hvaða formi skráin er, viðhald upplýsinga í skránni, eftirlit með skráningu, gögn sem eru skráð og hvernig aðgreining frá öðrum eignum útgefandans er tryggð.
Sækist útgefandi eftir heimild til að breyta áður útgefnum skuldabréfum og öðrum skuldaviðurkenningum, gefnum út til að fjármagna skuldabréf sömu tegundar og heimilt er að hafa í tryggingasafni, í sértryggð skuldabréf samkvæmt lögum nr. 11/2008, þá skal hann leggja fram sérstaka greinargerð um framkvæmd breyt­ingar­innar. Með umsókn um breytingu skulu jafnframt fylgja önnur gögn sem til­greind eru í grein þessari, að teknu tilliti til þess að ekki er um nýja útgáfu að ræða.
Fjárhagsáætlun fyrir a.m.k. næstu 3 ár, staðfesta af löggiltum endurskoðanda, sem sýnir að fjárhagur útgefandans sé svo traustur að hagsmunum annarra kröfu­hafa sé ekki stefnt í hættu með útgáfu sértryggðra skuldabréfa, sbr. 2. tl. 2. mgr. 3. gr. laga nr. 11/2008 um sértryggð skuldabréf. Fjárhagsáætlun skal inni­halda viðskipta- og rekstraráætlun útgefandans þar sem tekið hefur verið tillit til áhrifa fyrirhugaðrar útgáfu á fjárhag hans, auk fyrirhugaðs vaxtar og uppbygg­ingar eigin fjár.
Upplýsingar um tölvukerfi sem verða notuð í tengslum við útgáfuna.
Aðrar upplýsingar sem máli skipta varðandi útgáfu sértryggðra skuldabréfa.
Skriflega yfirlýsingu útgefanda um að hann og útgáfan fullnægi þeim kröfum sem fram koma í lögum nr. 11/2008 um sértryggð skuldabréf og reglum þessum.

III. KAFLI

3. gr.

Til að ákvarða meginflokk hinnar veðsettu fasteignar skal fara eftir skrá Fasteignamats ríkisins um hana. Ef um erlenda fasteign er að ræða skal fara eftir fasteignamatsskrá í viðkomandi ríki sem er sambærileg fasteignamati ríkisins.

Þar sem veðsett fasteign er í fleiri en einum flokki skal flokkur fasteignarinnar vera ákvarðaður út frá þeim hluta fasteignarinnar sem hefur mest vægi.

Til þess að veðlán geti talist með í tryggingasafninu skulu húseignir skv. 1. og 2. tl. 1. mgr. 5. gr. laga nr. 11/2008 vera brunatryggðar þannig að veðlánið sem á fasteigninni hvílir sé að fullu tryggt. Sama á við um húseignir sem nýttar eru til búrekstrar, sbr. 3. tl. 1. mgr. 5. gr. sömu laga. Standi áhöfn (gripir, vélbúnaður) til tryggingar skuldabréfi skulu fullnægjandi lausafjártryggingar, að mati Fjármálaeftirlitsins, vera fyrir hendi.

Hafi vanskil veðlána sem eru hluti af tryggingasafninu, staðið í 90 daga eða lengur má ekki telja virði þeirra með í tryggingasafninu í tengslum við matið sem vísað er til í 11. og 12. gr. laga nr. 11/2008 um sértryggð skuldabréf.

4. gr.

Sá aðili er annast mat fasteigna í samræmi við 8. gr. laga nr. 11/2008 um sértryggð skuldabréf skal hafa bæði fræðilega þekkingu og hagnýta reynslu m.t.t. þess hvernig meta skal fasteignir. Hann skal vera vel kunnugur fasteignamarkaði þar sem veðsettar eignir eru staðsettar og fasteignamörkuðum almennt.

Samkvæmt 1. mgr. 8. gr. laga nr. 11/2008 um sértryggð skuldabréf skal við mat á markaðsvirði fasteigna beita mati er taki mið af söluverði í nýlegum viðskiptum með sambærilegar fasteignir. Með nýlegum er átt við viðskipti síðustu þriggja mánaða.

Í tengslum við sérstakt mat á markaðsvirði fasteigna skv. 2. mgr. 8. gr. laga nr. 11/2008 skal nota almennar og viðurkenndar aðferðir. Við matið er m.a. heimilt að byggja á gögnum um verðþróun fasteigna frá Fasteignamati ríkisins og annarri skipulagðri öflun upp­lýsinga um fasteignaverð, svo sem söluverði sambærilegra eigna, mati löggiltra fasteigna­sala eða sjóðstreymi leigutekna atvinnuhúsnæðis.

Útgefandi skal fylgjast reglulega með þróun fasteignaverðs á þeim svæðum þar sem hann veitir lán til fasteignakaupa. Ef lækkun verður á markaðsvirði skal útgefandinn ganga úr skugga um hvort eignir sem eru til tryggingar veittum lánum séu jafn mikils virði og við síðasta mat. Ef veruleg verðlækkun hefur átt sér stað á fasteignum á ákveðnum svæðum skal endurskoða matið sem snýr að veðum í eignum á því svæði.

IV. KAFLI

5. gr.

Andvirði tryggingasafnsins skal ávallt vera hærra en andvirði skuldbindinga vegna útgef­inna sértryggðra skuldabréfa.

Jöfnunarreglu 11. gr. laga nr. 11/2008 um sértryggð skuldabréf ber að skilja á þann veg að taka eigi tillit til breytinga á gjaldmiðlum og áhrifa þeirra á afleiðusamninga í útreikn­ingi á uppreiknuðu virði.

Í því tilviki þegar sértryggð skuldabréf hafa verið gefin út á yfirverði, myndar bókfærð staða þeirra grundvöll fyrir jöfnunarútreikning.
Í því tilviki þegar tryggingasafnið inniheldur skuldabréf sem hefur verið keypt með afföllum myndar bókfærð staða þess grundvöll fyrir jöfnunarútreikning.

Þegar útgefandi sértryggðra skuldabréfa hefur gert afleiðusamning í því skyni að breyta grunngjaldmiðli fyrir tiltekinn hluta sértryggðra skuldabréfa skal reikna andvirði þeirra út með tilliti til áhrifa afleiðusamningsins.

Skilyrði þess að 12. gr. laga nr. 11/2008 um sértryggð skuldabréf teljist uppfyllt er að hæfilegt jafnvægi sé milli virðis tryggingasafns og þess flokks sértryggðra skuldabréfa sem tilheyrir viðkomandi safni. Skilyrðið um hæfilegt jafnvægi telst uppfyllt ef útreiknað núvirði eigna í tryggingasafni er á hverjum tíma hærra en núvirði skuldbindinganna.

Það er einnig gert að skilyrði skv. 12. gr. laga nr. 11/2008 um sértryggð skuldabréf að innstreymi greiðslna af eignum í tryggingasafni og útstreymi greiðslna af sértryggðu skulda­bréfunum sé þannig að hægt sé að efna skuldbindingar gagnvart eigendum sér­tryggðu bréfanna og gagnaðilum afleiðusamninga. Innborganir af eignum í trygginga­safni eru hluti af tryggingasafninu og skulu varðveittar á sérstökum reikningi skv. 12. gr. laganna.

6. gr.

Núvirði eigna í tryggingasafninu skal á hverjum tíma vera hærra en núvirði skuldbindinga vegna útgefinna sértryggðra skuldabréfa. Við útreikninga á núvirði eigna og skulda, skal ætíð taka núvirði afleiðusamninga með í reikninginn. Útreikninga skal framkvæma svo oft sem þurfa þykir en eigi sjaldnar en vikulega.

Miða skal við ávöxtunarkröfu sambærilegra skuldabréfa útgefinna af íslenska ríkinu í tilviki bréfa í íslenskum krónum. Við mat á sambærileika skal að lágmarki taka tillit til þess hvort verðtrygging sé til staðar og bera saman líftíma og endurgreiðsluskilmála.

Ef um aðrar myntir er að ræða skal nota fyrirfram skilgreinda afvöxtunarstuðla sem speglast af lánaskiptavaxtaferli (e. swap rate curve) viðkomandi gjaldmiðils eða af öðrum vaxtaferli sem er almennt notaður til að lýsa vaxtastigi viðkomandi markaðar. Rökstuðningi fyrir vali á afvöxtunarstuðlum skal halda til haga.

Til viðbótar núvirðisútreikningunum skal útgefandi sértryggðra skuldabréfa með reglu­legum hætti framkvæma aðra viðeigandi útreikninga sem grundvallaðir eru á óvæntum og varanlegum vaxtabreytingum, t.d. sviptibreytingum á viðeigandi vaxtaferli.

7. gr.

Ákvæði 6. gr. þessara reglna skal ennfremur vera fullnægt að gefnum eftirfarandi vaxta­breytingum:

Í tilviki íslensku krónunnar:

Skyndileg og varanleg hækkun vaxta viðmiðunarskuldabréfanna sem kveðið er á um í 6. gr. um eitt prósentustig.
Skyndileg og varanleg lækkun vaxta viðmiðunarskuldabréfanna sem kveðið er á um í 6. gr. um eitt prósentustig.

Í tilviki annarra gjaldmiðla en íslensku krónunnar:

Skyndileg og varanleg hliðrun lánaskiptavaxtaferilsins, eða annars vaxtaferils í samræmi við ákvæði 6. gr., um eitt prósentustig upp á við.
Skyndileg og varanleg hliðrun lánaskiptavaxtaferilsins, eða annars vaxtaferils í samræmi við ákvæði 6. gr., um eitt prósentustig niður á við.

8. gr.

Ef hluti eigna í tryggingasafni útgefanda er í öðrum gjaldmiðli en sértryggðu skuldabréfin skal uppfylla eftirfarandi skilyrði (þetta ákvæði á við þegar gjaldmiðlaáhætta er ekki að fullu varin (e. hedged)):

Samkvæmt vikulegum útreikningum skal núvirði tryggingasafnsins ætíð vera hærra heldur en núvirði skulda sem tengdar eru sértryggðu skuldabréfunum þótt óvænt og varanleg 10% breyting verði á hlutfallinu milli gjaldmiðils sértryggðu skuldabréfanna og gjaldmiðils eigna í tryggða safninu.
Í tengslum við útreikningana skal taka tillit til núvirðis afleiðusamninga.

Niðurstöður vikulegra útreikninga á núvirði, vaxtaáhættu og gjaldmiðlaáhættu skal varð­veita með tryggum hætti í 5 ár.

V. KAFLI

9. gr.

Afleiðusamningar sem útgefandi gerir vegna áhættustýringar sinnar m.t.t. jöfnunar­reglnanna sem kveðið er á um í 11. og 12. gr. laga nr. 11/2008 um sértryggð skulda­bréf mega einvörðungu tengjast sértryggðu skuldabréfunum og tryggingasafninu.

Afleiðusamningar mega ekki innihalda ákvæði um sjálfvirka lokun samninga ef útgefandi sértryggðu skuldabréfanna er tekinn til gjaldþrotaskipta eða að mótaðili afleiðu­samningsins geti sett fram slíka kröfu.

Mótaðilar afleiðusamninga skulu hafa hlotið lánshæfismatseinkunn fyrir fjárhagslegan styrk­leika frá matsfyrirtæki sem Fjármálaeftirlitið hefur viðurkennt, sbr. reglur Fjármála­eftirlitsins nr. 215/2007 um eiginfjárkröfur og áhættugrunn fjármálafyrirtækja. Fjármála­eftirlitið hefur viðurkennt þrjú neðangreind matsfyrirtæki. Skal slík einkunn liggja fyrir við upphaf samningagerðarinnar vegna viðkomandi afleiðusamnings. Einkunnin má ekki vera lægri en tilgreint er í töflunni hér fyrir neðan.

Krafa um lágmarkseinkunn mótaðila afleiðusamnings er uppfyllt ef ekkert annað mats­fyrirtæki gefur viðkomandi aðila einkunn sem er lægri en lágmarkseinkunn samkvæmt neðangreindri töflu. Ef sú er raunin verða a.m.k. tvö viðurkennd mats­fyrirtæki að gefa viðkomandi aðila einkunn sem er jöfn eða hærri lágmarkseinkunn samkvæmt eftirfarandi töflu: