1. gr.

Samkvæmt 7. gr. reglugerðar um fasteignaskatt nr. 1160/2005, sbr. 5. gr. laga um tekjustofna sveitarfélaga nr. 4/1995, getur Múlaþing veitt styrki vegna fasteigna þar sem rekin er, án þess að vera í ágóðaskyni, menningar-, æskulýðs- og tómstundastarfsemi og mannúðarstarfsemi.

2. gr.

Félagasamtök geta sótt um og fengið styrk hjá sveitarfélaginu vegna álagningar fasteignaskatts á húsnæði í þeirra eigu, sem nýtt er til ofangreindrar starfsemi. Styrkurinn nemur mismun á álagningu fasteignaskatts samkvæmt C-flokki sem lagður er á slíkt atvinnuhúsnæði og álagningu á viðkomandi húsnæði samkvæmt A-flokki. Af umræddu húsnæði greiðir eigandi því fasteignaskatt eins og um íbúðarhúsnæði væri að ræða.

3. gr.

Umsóknum skal skila til Múlaþings fyrir 31. janúar ár hvert. Í umsókninni komi fram lýsing á starfsemi sem fer að jafnaði fram í húsnæðinu og frávikum frá henni ef þau eru til staðar. Ef það húsnæði sem sótt eru um styrk fyrir er leigt út t.d. til veisluhalds, verslunarstarfsemi, dans­leikja­halds eða ferðaþjónustu, reiknast styrkurinn sem ákveðið hlutfall af nýtingu hússins. Heimilt er sveitar­félaginu að óska eftir frekari skýringum og gögnum hjá umsækjanda sem sýna fram á nýtingu hús­næðisins.

4. gr.

Af atvinnuhúsnæði sem sveitarfélagið er leigjandi að undir ofangreinda starfsemi greiðist fullur fasteignaskattur, enda skal gert ráð fyrir því í forsendum við útreikning húsaleigunnar.

5. gr.

Halda skal skrá yfir það húsnæði sem nýtur umræddra styrkja og skal hún lögð fyrir og staðfest af byggðarráði í upphafi hvers árs.

6. gr.

Reglur þessar öðlast þegar gildi.

Samþykkt í sveitarstjórn Múlaþings 9. febrúar 2022.

Egilsstöðum, 14. febrúar 2022.

Björn Ingimarsson sveitarstjóri.