1. gr.
Gildissvið og markmið.
Reglugerð þessi gildir um fjarskiptafyrirtæki og fjarskiptanet í skilningi laga um fjarskipti, nr. 70/2022. Hún gildir um lúkningu símtala í bæði farnetum og föstum netum innan Evrópska efnahagssvæðsins, svo og við þriðju ríki að uppfylltum nánari skilyrðum.
Með reglugerðinni er kveðið á um hámarksverð fyrir lúkningu símtala, þ.e. heildsöluverð sem fjarskiptafyrirtæki tekur fyrir að tengja endanotanda í sínu fjarskiptaneti við endanotanda í öðru fjarskiptaneti sem efnir til símtals.
2. gr.
Innleiðing.
Með reglugerð þessari öðlast gildi hér á landi framseld reglugerð framkvæmdastjórnarinnar (ESB) 2021/654 frá 18. desember 2021 um viðbætur við tilskipun Evrópuþingsins og ráðsins (ESB) 2018/1972 með því að ákvarða eitt hámarksverð fyrir lúkningu símtala í farsíma í Sambandinu og eitt hámarksverð fyrir lúkningu fastlínusímtala í Sambandinu, sem birt er sem fylgiskjal 1 við reglugerð þessa, sbr. ákvörðun sameiginlegu EES-nefndarinnar nr. 335/2022 frá 9. desember 2022 um breytingu á XI. viðauka samningsins um Evrópska efnahagssvæðið með þeim breytingum og viðbótum sem leiðir af XI. viðauka, bókun 1 um altæka aðlögun og öðrum ákvæðum samningsins.
3. gr.
Eftirlit og viðurlög.
Fjarskiptastofa hefur eftirlit með framkvæmd laga um fjarskipti, nr. 70/2022, þar á meðal að því er varðar hámarksverð fyrir lúkningu símtala, sem nánar eru útfærðar í reglugerð þessari.
Um framkvæmd eftirlits, aðgang Fjarskiptastofu að upplýsingum og úrlausn deilumála fer samkvæmt lögum um Fjarskiptastofu, nr. 75/2021.
Brot á reglugerð þessari varða viðurlögum samkvæmt ákvæðum XV. kafla laga um fjarskipti, nr. 70/2022.
4. gr.
Heimild og gildistaka.
Reglugerð þessi er sett með heimild í 2. mgr. 53. gr., sbr. 107. gr. laga um fjarskipti, nr. 70/2022, og öðlast þegar gildi.
Háskóla-, iðnaðar- og nýsköpunarráðuneytinu, 13. desember 2022.
Áslaug Arna Sigurbjörnsdóttir.
Ásdís Halla Bragadóttir.
Fylgiskjal. (sjá PDF-skjal)
|