Þrátt fyrir ákvæði reglna um námsmat fyrir Háskólann á Akureyri nr. 921/2018 gildir eftir­farandi bókun háskólaráðs um námsmat á haustmisseri 2020:

Í ljósi takmarkana á skólastarfi vegna farsóttar er ljóst að breyta þarf fyrirkomulagi prófa sem áætluð voru á prófstöðum á haustmisseri 2020,  á hér einnig við um próf sem áætluð eru á símats­dögum.  Önnur próf en próf sem eru hluti af samkeppnisprófum eða þar sem fjöldatakmarkanir eru  verða  ekki haldin á prófstöðum  vegna námsmats hausmisseris 2020.  Í einstaka tilfellum geta for­setar veitt undanþágu frá þessari reglu. Fyrirkomulag lokaprófa skal liggja fyrir í síðasta lagi 2. nóv­ember næstkomandi.  Umsjónarkennarar námskeiða ákveða  tilhögun námsmats  í samráði við stjórn­endur á fræðasviði  og verða nauðsynlegar breytingar á námsmati gerðar að  höfðu samráði við full­trúa stúdenta eftir því sem kostur er.  Skal leitast við að fara eftir gildandi reglum um námsmat eftir því sem unnt er.  Ef gerðar eru breytingar á fyrirkomulagi eða framkvæmd prófs  eða öðru náms­mati  skal námsmat  í  endurtökupróftíð  vera sambærilegt og í reglulegri próftíð.

Nemendur sem staðist hafa námsmat í námskeiði á  haustmisseri  2020  geta óskað eftir að fá birtri lokaeinkunn breytt í „staðið“ á námsferli.

Gjald vegna skráningar í endurtökupróf verður ekki innheimt á haustmisseri 2020. 

Samkeppnispróf verða haldin á próftökustöðum  og  nemendum skipt upp í hópa í samræmi við fyrirmæli stjórnvalda um  takmarkanir á skólastarfi vegna farsóttar.  Ef allir nemendur geta ekki tekið próf á sama tíma vegna fjöldatakmarkana er heimilt að dreifa próftöku yfir daginn.

Ákvarðanir um  framkvæmd prófa og námsmats  eru teknar í samræmi við leiðbeiningar stjórn­valda  hverju sinni  og er þessi ákvörðun kynnt með það að  markmiði  að eyða óvissu um fram­kvæmd  prófa  á haustmisseri  til þess að  létta álagi af nemendum vegna aðstæðna í samfélaginu vegna COVID-19  og  gera nemendum kleift að ljúka námi á haustmisseri 2020.

Auglýsing þessi, sem háskólaráð hefur samþykkt, er birt með stoð í lögum nr. 85/2008 um opinbera háskóla og taka ákvæði hennar þegar gildi.

Háskólanum á Akureyri, 26. október 2020.

Eyjólfur Guðmundsson rektor.