1. gr.

Gjöld samkvæmt samþykkt þessari.

Lóðarhafar og framkvæmdaaðilar innan Djúpavogshrepps greiða til sveitarfélagsins eftirtalin gjöld samkvæmt samþykkt þessari:

1. Gatnagerðargjald.
2. Byggingarleyfisgjald.
3. Afgreiðslu- og þjónustugjöld vegna mannvirkjamála.
4. Framkvæmdaleyfisgjöld.
5. Gjöld vegna vinnu eða breytinga á skipulagsáætlunum.

2. gr.

Gatnagerðargjald.

Af öllum nýbyggingum og viðbyggingum í þéttbýli á Djúpavogshreppi, samkvæmt samþykktu deili­skipulagi eða staðfestu aðalskipulagi, skal greiða gatnagerðargjald samkvæmt samþykkt þessari, sbr. 12. gr. laga um gatnagerðargjald nr. 153/2006.

Gatnagerðargjaldi skal varið til gatnagerðar í sveitarfélaginu og viðhalds gatna og annarra gatna­mannvirkja. Gjaldinu skal þannig m.a. varið til að undirbyggja götur með tilheyrandi lögnum, m.a. vegna götulýsingar og til að leggja bundið slitlag, gangstéttir, umferðareyjar og þess háttar þar sem gert er ráð fyrir því í skipulagi.

Stofngjöld fráveitu og vatnsveitu og byggingarleyfisgjöld eru innheimt sérstaklega og ekki innifalin í gatnagerðargjaldi.

3. gr.

Gjaldstofn gatnagerðargjalds og tímamark álagningar.

Gatnagerðargjald er tvíþætt. Annars vegar er það vegna nýrra bygginga og hins vegar vegna stækk­unar á eldra húsnæði.

Stofn til álagningar gatnagerðargjalds er fermetrafjöldi byggingar á tiltekinni lóð. Gjaldstofninn er ákveðinn á eftirfarandi hátt:

1. Þegar sveitarfélagið úthlutar eða selur lóð eða byggingarrétt á lóð er gatnagerðargjald lagt á í samræmi við fermetrafjölda þeirrar byggingar sem heimilt er að reisa á viðkomandi lóð samkvæmt gildandi deiliskipulagi. Þó skal aldrei miða álagninguna við hærra nýtingarhlutfall en 0,4 fyrir einbýlishús.
2. Þegar gatnagerðargjald verður ekki lagt á skv. a-lið, eða ef byggingarleyfi er veitt fyrir stærri byggingu en álagning skv. a-lið var upphaflega miðuð við, er við útgáfu bygg­ingar­leyfis lagt á gatnagerðargjald í samræmi við fermetrafjölda þeirrar byggingar sem bygg­ingar­leyfi tekur til. Gildir þá jafnframt:
   1. Gatnagerðargjald skal innheimt vegna stækkunar byggingar sem nemur fermetra­fjölda stækkunar.
   2. Gatnagerðargjald skal innheimt ef reist er ný og stærri bygging í stað annarrar á sömu lóð sem stækkuninni nemur. Gildir þessi regla um byggingar sem samþykkt er byggingarleyfi fyrir allt að fimm árum eftir að leyfi er gefið fyrir niðurrifi byggingar. Að öðrum kosti skal greiða fullt gatnagerðargjald.
   3. Þegar veitt er byggingarleyfi fyrir endurbyggingu, breytingu eða breyttri notkun húsnæðis þannig að hún færist í hærri gjaldflokk, sbr. 4. gr. skal greiða gatna­gerðar­gjald sem svarar til mismunar hærri og lægri gjaldflokksins. Lóðarhafi, eða bygg­ingar­leyfis­hafi þar sem það á við, á ekki rétt á endurgreiðslu ef bygging færist í lægri gjaldflokk við slíka breytingu.

Hafi gatnagerðargjald verið lagt á í samræmi við a-lið greinarinnar, skal ekki greitt af viðbyggingu, nema að því leyti sem viðbygging felur í sér hærra nýtingarhlutfall en fyrri álagning byggði á, þó ekki í tilvikum þar sem hámark skv. 1. mgr. 4. gr. um einbýlishúsalóðir á við.

4. gr.

Útreikningur gatnagerðargjalds.

Við álagningu gatnagerðargjalds skv. a-lið 3. gr. skal gatnagerðargjald reiknað út frá fermetrafjölda skv. tilgreindu hámarksnýtingarhlutfalli lóðar, sbr. 3. gr. Sé þess óskað að byggja meira en nýt­ingar­hlutfall lóðar segir til um skal greiða gatnagerðargjald miðað við það nýtingarhlutfall. Um einbýlishúsalóðir gildir þó alltaf, að aldrei skuli miða álagningu við hærra nýtingarhlutfall en 0,4.

Við álagningu gatnagerðargjalds skv. b-lið 3. gr. skal gatnagerðargjald reiknað út frá raunfjölda fermetra byggingar, hvort sem um er að ræða viðbyggingu, endurbyggingu, breytingu notkunar eða önnur tilvik.

Af hverjum fermetra skal greiða ákveðinn hundraðshluta byggingarkostnaðar pr. fermetra vísi­tölu­húss fjölbýlis eins og hann er hverju sinni samkvæmt útreikningum Hagstofu Íslands á grund­velli laga nr. 42/1987 um vísitölu byggingarkostnaðar. Hundraðshluti byggingarkostnaðar ákvarðast eftir hústegund svo sem hér segir:

Þegar byggingarleyfi á geymslulóð er gefið út skal greiða gatnagerðargjald eins og um iðnaðar- og geymsluhúsnæði sé að ræða að frádregnu áður greiddu gjaldi, framreiknuðu miðað við bygg­ingar­vísitölu.

Fjárhæðir taka breytingum 1. dag hvers mánaðar í samræmi við breytingu á byggingarkostnaði vísitöluhússins (nú 213.303 kr./m², byggingarvísitala grunnur 2010, 137,0 stig í janúar 2018).

5. gr.

Undanþágur frá greiðslu gatnagerðargjalds.

Undanþegnar greiðslu gatnagerðargjalds eru eftirtaldar byggingar:

1. Óeinangruð hús, minni en 15 fermetrar.
2. Óupphituð svalaskýli íbúðarhúsa sem eru 20 fermetrar eða minni

6. gr.

Sérstök lækkunarheimild gatnagerðargjalds.

Sveitarstjórn er heimilt skv. 6. gr. laga nr. 153/2006 að lækka eða fella niður gatnagerðargjald af einstökum lóðum í sveitarfélaginu við sérstakar aðstæður.

7. gr.

Gjalddagar og greiðsluskilmálar.

Gjalddagi 50% gatnagerðargjalds er við lóðarveitingu og gjalddagi eftirstöðva þegar byggingarleyfi er veitt, þó eigi síðar en 6 mánuðum frá lóðarúthlutun. Hafi gjöldin eigi verið greidd innan ofan­greinds frests, fellur úthlutun lóðarinnar úr gildi. Gjalddagi gatnagerðargjalds í öðrum tilvikum en við úthlutun lóðar miðast við útgáfu byggingarleyfis.

Umsækjandi lóðar, sem fengið hefur sömu lóð úthlutað án þess að greiða innan mánaðar gatna­gerðar­gjald, fær ekki úthlutað lóðinni í þriðja sinn, nema fyrir liggi greiðsla gatnagerðargjalds.

Eindagi gjalda skv. samþykkt þessari er 30 dögum eftir gjalddaga.

8. gr.

Ábyrgð á greiðslu gatnagerðargjalds.

Lóðarhafi leigulóðar og eigandi eignarlóðar ber ábyrgð á greiðslu gatnagerðargjalds.

9. gr.

Endurgreiðsla gatnagerðargjalds.

Gatnagerðargjald skal endurgreitt í eftirtöldum tilvikum:

1. Ef lóðarhafi skilar úthlutaðri lóð eða ef lóðarúthlutun er afturkölluð eða fellur niður, sbr. reglur sveitarfélagsins um úthlutun lóða.
2. Ef gatnagerðargjald hefur verið greitt í tengslum við útgáfu byggingarleyfis, en leyfið fellur úr gildi.

Gatnagerðargjald skal endurgreitt innan 90 daga, vegna endurgreiðslu skv. a-lið, sama gildir um gatnagerðargjald sem lagt hefur verið á í tengslum við útgáfu byggingarleyfis, sbr. b-lið, en þá skal gatnagerðargjald endurgreitt innan 90 daga frá því að byggingarleyfishafi hefur sannanlega krafist endurgreiðslu.

Um endurgreiðslu fer að öðru leyti skv. 9. gr. laga um gatnagerðargjald nr. 153/2006, sbr. breyt­ingar­lög nr. 6/2009.

Endurgreiðsla gatnagerðargjalds vegna lóða sem úthlutað var eða veitt byggingarleyfi, fyrir gildis­töku laga nr. 6/2009 þann 4. mars 2009, skal verðbætt miðað við vísitölu neysluverðs frá greiðslu­degi til endurgreiðsludags.

10. gr.

Eldri samningar og skilmálar um gatnagerðargjald.

Um samninga um gatnagerðargjald af tilteknum lóðum, sem lóðarhafar eða lóðareigendur hafa gert við Djúpavogshrepp fyrir gildistöku samþykktar þessarar, svo og skilmálar varðandi gatna­gerðar­gjald, sem sveitarstjórn hefur sett fyrir sömu tímamörk og lóðarhafi og lóðareigandi hefur undirgengist, fer eftir þágildandi gjaldskrám.

11. gr.

Stofngjald vatnsveitu.

Tekjum sveitarfélagsins af stofngjaldi vatnsveitu skv. 1. gr. skal varið til að standa straum af stofn­kostnaði og rekstri vatnsveitu.

Stofngjald vatnsveitu skal innheimt af öllum fasteignum sem tengdar eru við vatnsveitu í eigu Djúpa­vogs­hrepps. Gjaldið skal lagt á og innheimt við veitingu byggingarleyfis og vera sem hér segir:

Tafla 1 - Stofngjald vatnsveitu.

12. gr.

Stofngjald holræsa.

Tekjum sveitarfélagsins af holræsagjaldi skv. 1. gr. skal varið til lagningar og viðhalds holræsa (fráveitna).

Stofngjald fráveitu (holræsa) skal innheimta af öllum fasteignum sem tengdar eru við fráveitu í eigu Djúpavogshrepps. Gjaldið skal lagt á og innheimt við veitingu byggingarleyfis og vera sem hér segir:

Tafla 2 - Stofngjald holræsa.

13. gr.

Byggingarleyfisgjald.

Innheimta skal byggingarleyfisgjald fyrir hverja þá framkvæmd sem byggingarleyfi er gefið út fyrir.

Byggingarleyfisgjald er óendurkræft grunngjald, að viðbættu gjaldi pr. m³ byggingar. Þó skal ekki innheimta byggingarleyfisgjald fyrir byggingar sem eru 7 m² eða minni, nema um viðbyggingar sé að ræða.

Innifalið í byggingarleyfisgjaldi er lögboðin meðferð byggingarleyfiserinda, lóðarblöð, yfirferð teikn­inga, útmæling fyrir húsi og hæðarkóta og reglubundið eftirlit, eftir því sem við á.

Byggingarleyfisgjald samkvæmt eftirfarandi töflu er innheimt við útgáfu byggingarleyfis:

Tafla 3 – Byggingarleyfisgjöld.

14. gr.

Afgreiðslu- og þjónustugjöld vegna mannvirkjamála.

Gjalddagi afgreiðslu- og þjónustugjalda vegna mannvirkjamála miðast við útgáfu viðkomandi vott­orða og ákveðst samhliða því að önnur þjónusta er veitt.

Tafla 4 - Þjónustugjöld.

15. gr.

Framkvæmdaleyfisgjöld.

Innheimta skal framkvæmdaleyfisgjald fyrir hverja þá framkvæmd sem framkvæmdaleyfi er gefið út fyrir. Gjaldið má ekki nema hærri upphæð en nemur kostnaði við undirbúning og útgáfu leyfisins og eftirlitið, svo sem vegna nauðsynlegrar aðkeyptrar þjónustu.

Framkvæmdaleyfisgjald samkvæmt eftirfarandi töflu eru innheimt við útgáfu framkvæmdaleyfis. Gjalddagi eftirlitsgjalds er í kjölfar eftirlits:

Tafla 5 – Framkvæmdaleyfisgjöld.

16. gr.

Gjöld vegna vinnu eða breytinga á skipulagsáætlunum.

Sé þörf á að vinna skipulagsáætlun eða gera breytingu á henni vegna leyfisskyldra framkvæmda getur sveitarstjórn innheimt gjald fyrir skipulagsvinnu sem nauðsynleg er vegna þeirrar fram­kvæmdar, samkvæmt eftirfarandi töflu. Gjaldið skal ekki nema hærri upphæð en nemur kostnaði við skipulagsgerðina og kynningu og auglýsingu skipulagsáætlunar og eru einstakir gjalda­liðir því settir fram til viðmiðunar.

Gjalddagi gjalda vegna skipulagsáætlana miðast við það þegar vinna fer fram og/eða kostnaður fellur til. Gjöld skulu innheimt samkvæmt sérstökum innheimtuseðlum.

Tafla 6 – Vegna aðalskipulagsbreytinga.

17. gr.

Upphæðir samkvæmt samþykkt þessari eru miðaðar við vísitölu byggingarkostnaðar, eins og hún var í janúar 2018 (137 stig) og skulu uppfærð eftir byggingarvísitölu janúar hvers árs, nema er varðar gatnagerðargjald. Gatnagerðargjald uppreiknast miðað við 1. dag þess mánaðar er það er lagt á.

Öll gjöld samkvæmt 1. gr. eru, ásamt áföllnum vöxtum og kostnaði, tryggð með lögveðsrétti í viðkomandi fasteign og eru aðfararhæf samkvæmt 10. tl. 1. mgr. laga um aðför nr. 90/1989. Framkvæmdaleyfisgjald og gjöld vegna stöðuleyfa njóta þó ekki lögveðsréttar.

Séu gjöld ekki greidd á eindaga reiknast dráttarvextir frá gjalddaga, samkvæmt ákvæðum laga nr. 38/2001 um vexti og verðtryggingu.

Sé úthlutaðri lóð skilað, lóðarúthlutun afturkölluð eða byggingarleyfi fellt úr gildi, skal endurgreiða gatnagerðargjald skv. 2. mgr. 1. gr. laga um gatnagerðargjald nr. 17/1996. Gatnagerðargjald skal endurgreiða með verðbótum, miðað við vísitölu byggingarkostnaðar, en vaxtalaust.

Stofngjöld fráveitu og vatnsveitu skulu endurgreidd með sama hætti og gatnagerðargjald.

Endurgreiðslu gatnagerðargjalds og stofngjalda fráveitu og vatnsveitu er heimilt að fresta þar til lóð er úthlutað að nýju, en þó ekki lengur en í 6 mánuði frá afturköllun lóðar eða niðurfellingu bygg­ingar­leyfis.

Kostnaður lóðarhafa vegna lóðar sem er skilað eða ef byggingarleyfi hefur verið afturkallað vegna atriða er varða lóðarhafa, svo sem hönnunar- og rannsóknarkostnaður eða framkvæmdir unnar sam­kvæmt graftrarleyfi áður en byggingarleyfi er gefið út, er ekki endurgreiddur af sveitarfélaginu. Sveitar­félagið endurgreiðir ekki kostnað við jarðvegsskipti á lóð sem skilað er, eða við niðurfellingu bygg­ingar­leyfis.

Sé byggingarleyfi afturkallað vegna atriða er ekki varða lóðarhafa gilda ákvæði 5. mgr. 9. gr. varðandi endurgreiðslu kostnaðar til lóðarhafa. Þó skal hönnunarkostnaður vegna byggingar og rannsóknarkostnaður á lóðinni ekki endurgreiddur.

Sé lóð afturkölluð eða byggingarleyfi fellt úr gildi eftir að undirstöður (sökklar) eru fullgerðar, eða á síðari stigum byggingarframkvæmda, skulu tveir dómkvaddir matsmenn verðleggja þær fram­kvæmdir sem unnar hafa verið, enda hafi þær verið teknar út og viðurkenndar af bygg­ingar­fulltrúa. Kostnað vegna mats greiða sveitarfélagið og lóðarhafi að jöfnu. Djúpavogs­hreppur skal leysa til sín lóðina með mannvirkjum á grundvelli matsins, að frádreginni hlutdeild lóðar­hafa í kostnaði vegna matsgerðarinnar.

18. gr.

Sveitarstjórn er heimilt að auglýsa lóðir með lægri gatnagerðargjaldi en 3. gr. mælir fyrir um, ef sérstakar aðstæður eru sem gera byggingarframkvæmdir óvenju erfiðar eða kostnaðarsamar.

19. gr.

Öll framangreind gjöld eru, ásamt áföllnum vöxtum og kostnaði, tryggð með lögveðsrétti í við­komandi fasteign og eru aðfararhæf.

Gatnagerðargjald byggir á lögum um gatnagerðargjald nr. 153/2006 og reglugerð um gatna­gerðar­gjald nr. 543/1996.

Stofngjald vatnsveitu byggir á lögum um vatnsveitur sveitarfélaga nr. 32/2004.

Holræsagjald byggir á ákvæðum V. kafla laga um uppbyggingu og rekstur fráveitna, nr. 9/2009.

Byggingarleyfisgjald samkvæmt töflu 3 og þjónustugjöld samkvæmt töflu 4 byggja á IX. kafla laga um mannvirki nr. 160/2010.

Gjöld vegna framkvæmdaleyfa og grenndarkynninga byggja á skipulagslögum nr. 123/2010.

Hafi hluti gatnagerðargjalds af íbúðarlóð á Djúpavogi verið greiddur fyrir gildistöku samþykktar þessarar, skal miða útreikning heildargatnagerðargjalds af viðkomandi lóð, svo og gjalddaga við ákvæði samþykktar nr. 506/2013.

Samþykkt þessi tekur gildi við birtingu og fellur þá úr gildi samþykkt nr. 506/2013 um gatna­gerðar­gjald stofngjald holræsa stofngjald vatnsveitu byggingarleyfisgjöld og framkvæmda­leyfis­gjald í Djúpavogshreppi.

Samþykkt af sveitarstjórn Djúpavogshrepps 12. apríl 2018.

Djúpavogi, 16. apríl 2018.

Gauti Jóhannesson sveitarstjóri.