1. gr.
B-hluti 46. gr. samþykktarinnar breytist og verður svohljóðandi:
- Fulltrúar í fastanefndir kjörnir út kjörtímabilið á fyrsta eða öðrum fundi að afloknum sveitarstjórnarkosningum:
- Fjölskyldusvið:
- Velferðarnefnd. Sveitarstjórn kýs fimm fulltrúa og jafnmarga til vara skv. 5. gr. laga um félagsþjónustu sveitarfélaga nr. 40/1991. Nefndin fer með jafnréttismál samkvæmt lögum um jafnan rétt og jafna stöðu kvenna og karla nr. 10/2008. Nefndin fer með málefni félagsþjónustu sveitarfélagsins. Velferðarnefnd hefur umsjón með framkvæmd laga um málefni fatlaðs fólks skv. lögum um málefni fatlaðs fólks með langvarandi stuðningsþarfir nr. 38/2018 og málefni aldraðra samkvæmt lögum um málefni aldraðra nr. 125/1999 og sbr. 19. gr. laga nr. 37/2018. Nefndin fer með húsnæðismál samkvæmt lögum um húsnæðismál nr. 44/1998, svo og húsaleigusamninga samkvæmt lögum um húsaleigubætur nr. 138/1997. Nefndin skal leggja fram tillögur til sveitarstjórnar um útgjaldaliði í fyrrgreindum málaflokkum í tengslum við gerð fjárhagsáætlunar. Auk ofangreindra verkefna skal nefndin sinna öðrum þeim verkefnum sem sveitarstjórn felur henni með erindisbréfi.
- Fræðslunefnd. Sveitarstjórn kýs fimm fulltrúa og jafnmarga til vara. Nefndin fer með málefni leikskóla samkvæmt lögum um leikskóla nr. 90/2008, málefni grunnskóla samkvæmt lögum um grunnskóla nr. 91/2008, málefni tónlistarskóla samkvæmt lögum um fjárhagslegan stuðning við tónlistarskóla nr. 75/1985 og samkvæmt ákvæðum samstarfssamninga sem um rekstur tónlistarskóla gilda hverju sinni, málefni framhaldsskóla samkvæmt lögum um framhaldsskóla nr. 92/2008 og samstarfssamninga um rekstur framhaldsskóla sem gilda hverju sinni og æskulýðsmál samkvæmt æskulýðslögum nr. 70/2007. Þá fer nefndin með íþróttamál samkvæmt íþróttalögum nr. 64/1998 og reglugerðum þar um. Nefndin skal leggja fram tillögur til sveitarstjórnar um útgjaldaliði í fyrrgreindum málaflokkum í tengslum við gerð fjárhagsáætlunar. Auk ofangreindra verkefna skal nefndin sinna öðrum þeim verkefnum sem sveitarstjórn felur henni með erindisbréfi.
- Stjórnsýslu- og þjónustusvið:
- Skipulags- og byggingarnefnd. Sveitarstjórn kýs fimm fulltrúa og jafnmarga til vara. Nefndin fer með byggingar- og skipulagsmál, þ.m.t. umhverfismat skipulagsáætlana. Nefndin starfar m.a. samkvæmt lögum um mannvirki nr. 160/2010, byggingarreglugerð nr. 112/2012, skipulagslögum nr. 123/2010 og skipulagsreglugerð nr. 90/2013. Nefndin hefur einnig frumkvæði að gerð skipulagsáætlana og skipulagsskilmála. Nefndin skal leggja fram tillögur til sveitarstjórnar um útgjaldaliði í fyrrgreindum málaflokkum í tengslum við gerð fjárhagsáætlunar. Auk ofangreindra verkefna skal nefndin sinna öðrum þeim verkefnum sem sveitarstjórn felur henni með erindisbréfi.
- Umhverfis- og landbúnaðarnefnd. Sveitarstjórn kýs fimm fulltrúa og jafnmarga til vara. Verkefni nefndarinnar eru m.a. að sjá um framkvæmd laga um búfjárhald nr. 38/2013, framkvæmd laga um landgræðslu nr. 17/1965 og búnaðarlög, nr. 70/1998. Nefndin fer með veitumál skv. ákvæðum laga og reglugerða um vatns- og hitaveitur. Nefndin hefur umsjón með eyðingu refa og minka samkvæmt lögum um vernd, friðun og veiðar á villtum fuglum og villtum spendýrum. Nefndin fjallar um málefni girðinga skv. vegalögum. Nefndin fjallar um málefni sorphirðu og sorpeyðingar. Nefndin skal leggja fram tillögur til sveitarstjórnar um útgjaldaliði í fyrrgreindum málaflokkum í tengslum við gerð fjárhagsáætlunar. Auk ofangreindra verkefna skal nefndin sinna öðrum þeim verkefnum sem sveitarstjórn felur henni með erindisbréfi.
- Skrifstofa sveitarstjóra.
- Atvinnu, markaðs- og menningarmálanefnd. Sveitarstjórn kýs fimm fulltrúa og jafnmarga til vara. Nefndin fer með málefni atvinnulífs í sveitarfélaginu utan landbúnaðarmál, markaðsstarfsemi, upplýsinga- og kynningarmál sveitarfélagsins og gerir tillögur til sveitarstjórnar í þeim efnum. Nefndin fer með málefni bókasafna samkvæmt bókasafnalögum nr. 150/2012 og málefni safna, sbr. safnalög nr. 141/2011. Nefndin fer með menningarmál í sveitarfélaginu ásamt málefnum félagsheimila. Nefndin skal leggja fram tillögur til sveitarstjórnar um útgjaldaliði í fyrrgreindum málaflokkum í tengslum við gerð fjárhagsáætlunar. Auk ofangreindra verkefna skal nefndin sinna öðrum þeim verkefnum sem sveitarstjórn felur henni með erindisbréfi.
2. gr.
5. mgr. 46 gr. samþykktarinnar breytist og verður svohljóðandi:
Sviðsstjóri stjórnsýslu- og þjónustusviðs er staðgengill sveitarstjóra.
3. gr.
52. gr. samþykktarinnar breytist og verður svohljóðandi:
Sveitarstjórn er heimilt að fela eftirtöldum starfsmönnum fullnaðarafgreiðslu einstakra mála á sama hátt og með sömu skilyrðum og nefnd eru í 34. gr.:
- Sviðsstjóra fjármálasviðs í umboði byggðarráðs að afgreiða afslátt af fasteignasköttum til elli‑ og örorkulífeyrisþega á grundvelli samþykktra reglna þar um, sbr. 4. mgr. 5. gr. laga um tekjustofna sveitarfélaga nr. 4/1995.
- Byggingarfulltrúa að afgreiða mál samkvæmt samþykkt sveitarstjórnar um afgreiðslu byggingarfulltrúa í Borgarbyggð og sbr. lög um mannvirki nr. 160/2010.
- Sveitarstjóra í umboði byggðarráðs samkvæmt áfengislögum nr. 75/1998, gildandi málsmeðferðarreglum um áfengisveitingaleyfi og lögum um veitinga- og gististaði nr. 85/2007 að gefa umsagnir um veitingu og endurnýjun rekstrar- og veitingaleyfa auk annarra leyfa sem varðar afmarkaða atburði í samfélaginu.
- Sviðsstjóra fjölskyldusviðs í umboði velferðarnefndar að veita fjárhagsaðstoð til framfærslu í samræmi við reglur um fjárhagsaðstoð í Borgarbyggð, samþykktar af sveitarstjórn, og sbr. lög um félagsþjónustu sveitarfélaga nr. 40/1991.
Sveitarstjórn getur sett sérstakan viðauka um fullnaðarafgreiðslu starfsmanna. Viðkomandi nefndir og ráð skulu hafa eftirlit með þeim afgreiðslum og kalla reglulega eftir skýringum og upplýsingum um ákvarðanir sem teknar eru á grundvelli þeirra. Viðkomandi starfsmanni er alltaf heimilt að vísa ákvörðun skv. 1. mgr. til viðkomandi ráðs eða nefndar til fullnaðarafgreiðslu. Mál sem starfsmenn afgreiða skulu kynnt fyrir viðkomandi nefnd eða ráði með skriflegri skýrslu í lok hvers ársfjórðungs. Ef krafist er endurupptöku máls skv. þessari grein skal vísa málinu til afgreiðslu sveitarstjórnar.
4. gr.
Samþykkt þessi sem sveitarstjórn Borgarbyggðar hefur sett skv. ákvæðum 9. og 18. gr. sveitarstjórnarlaga nr. 138/2011, staðfestist hér með til að öðlast þegar gildi.
Samgöngu- og sveitarstjórnarráðuneytinu, 28. september 2020.
F. h. r.
Hermann Sæmundsson.
|